miércoles, 12 de agosto de 2015

Marañueles

¡Por fin Amparín!, esta receta ye pa ti ;)

Dulce típicu asturianu que tien bien de recetes y que tol mundu diz que la suya ye la meyor y yo nun voi ser menos, ¡la mio receta mola enforma! y mola porque dempués de probar munches, dalgunes porque nun yera bono de amasar y xuntar l'amiestu, otres porque s'usen trescientes yemes y una clara, cola consiguiente dulda de qué faer con eses clares que sobren dempués... Y esta, esta ye bona de faer, perrica y con ingredientes lóxicos :)



Y nun voi entrar en si son de Candás o de Lluanco, son les que faigo yo y les que más riques me parecen. 
Vos la presto si queréis :)

Vamos necesitar:
  • 350 gramos de mantequilla.
  • 1/2 kilo d'azúcre.
  • 1 kilo de farina de fuercia.
  • 4-5 güevos.
  • aralladura de llimón.
  • 1 sobre de formientu químicu.



Empezamos clarificando la mantequilla.(¡Tranquilidá! Esto ye na más faer que la mantequilla tea lo más pura posible, pa ello ponémosla nun cazu y dilíamosla, cuando tea, pasámosla per un pañu finu pa quitar les impureces y dexar solo'l sueru, que va ser colo que vamos trabayar).

N'otru recipìente batemos los güevos, hasta que tean toos bien integraos y salga daqué d'espumina, depués echámos-y l'azucre y batemos perbién.
Cuando la mantequilla templara un pocu, echámosla al amiestu xunto cola arrayadura de llimón y batímoslo too hasta que tea homoxéneu.
Echamos tola farina na encimera y faemos un furacu en mediu, onde, adulces, vamos echando l'amiestu líquido, xuntámoslo cola farina, y otru pocu,  asina hasta que l'acabemos toda.




Agora ye importante nun amasar de más, hai qu'amasar xusto por que se xunten tolos ingredientes, non más, yá que volveríen les marañueles dures y con una testura desagradable.
Agora vien la parte creativa, hai delles formes de marañueles tradicionales, los dos qu'apaecen nes semeyes son les que me gusten a mi, pero podéis probar les formes que queráis, teniendo en cuenta la grosez de les pieces pa dempués meteles nel fornu más o menos tiempu. Yo túveles alredor de 15-20 minutos a 180 graos.


Duren un montón de tiempu metíes nuna llata, asina que vos encamiento que cuando os pongáis faigáis munches, porque merez la pena teneles guardaes pa un apuru dulce ;)

Muá.

lunes, 13 de julio de 2015

Muffins de chocolate y chocolate

¡¡¡¡¡!!!!!

¡¡¡Toi encantada con mis primeros muffins!!!



Llevo bien de tiempu queriendo faer unos muffins, mercara eses cápsules tan mones y quería que los muffins tuvieren a la altura... Pasé enforma tiempu buscando recetes y mirando a ver la que me convencía pa entamar nesti mundu de les super magadalenes... y atopela equí.
¡¡Son una pasada!! Tán buenísimos, salen siempre, l'apariencia ye xenial y enriba duren un montón de díes en perfectu estáu... ¿daquién da más?

Nun vos dexo nun faélos, de verdad, son un viciu de los gordos :D


Además de los ingredientes, vamos precisar cápsules de muffins o madalenes.


 Pa faélos vamos necesitar:

  • 115g de mantequilla a temperatura ambiente 
  • 150g de chocolate negru cortáu finu
  • 180g de chocolate negru en cachos grandes
  • 150 g de chocolate blancu
  • 325g de farina 
  • 1 cuyaradina de lleldu químicu tipu Royal
  • 1 cuyaradina de bicarbonatu sódicu
  • 1/2 cuyaradina de sal 
  • 1 cuyaradina de pasta de vainilla
  • 125g d'azucre moreno
  • 2 güevos grandes
  • 180ml de lleche
  • 1 cuyaradina de zusmiu de llimón

Entemecemos la lleche col zusmiu y dexamos reposar 5-10 minutos.
Dilimos los 150g de chocolate negru xuntu cola mantequilla al bañu maría. Separtámoslo del fueu y dexamos templar.

N'otru bol, espayamos xuntos tolos ingredientes secos: farina, sal, lleldu, bicarbonatu. Acutamos.
Dempués batimos con unes barilles  l'amiestu de chocolate y mantequilla col azucre. De siguío incorporamos los güevos, la lleche, la vainilla y, dempués, con ayuda d'una espátula, echamos la farina.

Añedimos los cachos grandes de chocolate negru y blancu.
Echamos la masa nes cápsules, enllenándoles hasta siquier 3/4 de la so capacidá. 
Enfornamos unos 25 minutos.


Y llistos pa zampar, dempués de dexálos enfriar un plizcu, claro, que quemeeeen ;)




Muá.

miércoles, 10 de junio de 2015

Galletes de bizcochu de nata...

... por llamales de dalguna manera. Tienen forma y aspeutu de galleta, pero sospriende enforma por que la testura ye de bizcuechu bien nidiu.
Ye bien importante echa-yos penriba un bañu d'algo, nel mio casu usé chocolate, unos filinos na más, pero podríais bañales enteres penriba y echa-yos unos trocinos d'ablanes o de nueces, por exemplu.

Equí tenéis la receta, ¡que vos preste!


  • 200 ml de nata.
  • 400 gramos de farina.
  • 150 gramos d'azúcre.
  • 1 güevu grande.
  • Algo pa decorar: chocolate, frutos secos, azúcre glas...

Tenemos que trabayar los ingredientes col robot de cocina hasta que tengamos una masa pegañosa.
Pa poder manipulala, untamos les manes con aceite d'oliva, ponemos la masa enriba d'un papel de cocina y espurrímosla col rodiellu hasta que tea de mediu centímetru aprosimao.  
Dexamos reposar na nevera a lo menos una hora.
Arroxamos el fornu a 190 graos.
Faemos bolines cola masa, y vamos poniéndoles nuna bandexa dexándoles bastante separaes. Metémosles nel fornu 10 minutos.
Cuando veamos que tán doradines, sacámosles del fornu y dexámosles esfrecer enriba d'una rexilla, cuando tean llistes, echámos lo que tengamos preparáu percima, n'esti casu chocolate fundíu :)


¡Y a comer!

Muá.

miércoles, 13 de mayo de 2015

Galletes rellenes de frambuesa

Esta ye una receta enrevesadina, sí,  pa dedicá-y tiempu, tamién, y con dellos pasos que nun hai que saltase, pero ye de les que paguen la pena el tiempu que lleva con creces, porque salen unes galletes preciosísimes, con tol aspeutu de bonitísimes y dan muncha satisfacción veles feches, nun vos digo ná de probales... ¿Intentáislo?


Además de los ingredientes vamos necesitar un cortapastes redondu y otru mui pequeñu pa facer furaquinos.

Vamos necesitar:
  • 150 gramos d'azúcre.
  • 7 gramos d'azúcre vainillao.
  • 200 gramos de mantequilla pomada.
  • 1 güevu.
  • plizcu sal.
  • 300 gramos de farina.
  • 100 gramos d'almendres molides.
Podéis rellenales con mermelada de frambuesa o con un culís, o si non, facer como yo y rellenales de pasta de frambuesa:
  • 2 cuyaradines de pasta de frambuesa.
  • 50 gramos de mantequilla pomada.
  • 10 gramos d'azúcre glas. Esto tenéis que controlalo, hai delles marques que faen unes pastes de frambuesa mui ácides, echa-y l'azúcre al gustu.


Ponemos na batidora o batimos a mano l'azúcre, la sal, l'azúcre vainillao, la mantequilla y el güevu hasta que tengamos una espumina.
Tamizamos la farina penriba la mezcla y echamos l'almendra y batimos coles barilles o los ganchos de la batidora.
Cuando tea too bien amestao y ensin grumos, envolvémoslo en film y dexámoslo na nevera dos hores.
Sacámoslo de la nevera y partimos la masa en dos, una de les partes cortámosla col cortapastes redondu; cola otra parte la masa, cortamos tamién con mismu cortapastes, y dempués, con otru cortador más pequeñu, facémos-y furaquinos, col dibuxo que tengamos, pa que dempués se vea guapo el color de la pasta de frambuesta embaxo.

Metémosles por tandes nel fornu  a 180 graos 10-12 minutos.
Cuando enfríen les mitaes que tienen los furacos, echámos-yos azúcre glas penriba, y nes mitaes enteres, untámos-yos pasta de frambuesa, una capina mui finina, que tien sabor abondo y repuna.


Xuntamos la base con la parte de los furacos y ya tenemos unes galletes pa sorprender al más difícil... y además aguanten munchos díes igual de riques, ¡too ventaxes!

Muá.

miércoles, 15 de abril de 2015

Galletes d'avena y amapola

Estes galletes o roques, son pa quitar l'antoxu dulce cuando nun mos vien bien comelo, son suaves de sabor y testura, sanes polos ingredientes que lleven, abizcochadines y fáciles de facer. Una escusa perbona pa pasase un día :D






























Pa facer unes 14 o 16 galletes vamos necesitar:

  • 100 gramos de farina.
  • 1/2 cuyaradina de formientu.
  • 1 cuyaradina de canela.
  • 1 cuyaradina d'estractu de vainilla.
  • plizcu de sal.
  • 100 gramos d'azúcre moreno.
  • 2 cuyaraes d'agua.
  • 1 plátanu grande y maduru.
  • 40 ml d'aceite.
  • 140 gramos de copos d'avena.
  • 3 cuyaraes de semilles d'amapola.

Amestamos nuna conca la farina, el formientu, la canela, la vainilla y la sal.
Pero otru llau amestamos l'azúcre col aceite y el agua.
Machacamos el plátanu y echámoslu a los ingredientes moyaos. Xuntamos les dos mezcles y echámos-y les semilles.
Arroxamos el fornu a 170 graos.


Facemos bolines cola masa y ponémosles nuna bandexa de fornu, metémosles dientro 12-15 minutos, o hasta que tean dorades porriba y la base tea oscurina.
Dexamos enfriar nuna rexilla, con cuidau al sacales porque tan mui blandes.

Y a comer :)

Muá.


miércoles, 8 de abril de 2015

Sobaos

A ver, si nun sois tan friquis como yo, podéis facer un sobao desenorme, del tamañu del molde que tengáis, cortáis en cachinos individuales y arreglao, pero si nun tenéis na más que facer esta tarde, y queréis tiraros el pegote, ¡¡facé-y los papelinos!!

Atopé un tutorial mui prestosu aquí, vais estropiar dos o tres anantes de facelo bien,¡pero dempués presta facelos un montón! Y el resultao ye perfecto... 


Pa 12-15 sobaos vamos precisar:
  • 250 gramos de mantequilla templao.
  • 250 gramos d'azúcre.
  • 250 gramos de farina.
  • 3 güevos.
  • 1 sobre de formientu.
  • ralladura de mediu llimón.
  • plizcu de sal.

Entamamos esta receta prestosísima batiendo na batidora l'azúcre cola mantequilla hasta que tea bien amestao y suave, Añadimos los güevos ún a ún, batiendo ensin parar.
Tamizamos la farina col formientu y echámoslo penriba l'amestao; tamién la sal y la ralladura.

Echamos la masa nos papelinos y metémoslos al fornu a 180 graos más o menos 15 minutos o hasta que doren.

Nadie va creer que los ficísteis vosotros, y muncho menos así de fácil :)

Muá.

miércoles, 11 de marzo de 2015

Bollinos* con chocolate

Miráilos... si podéis aguantar un par de díes ensin faer esta receta ¡ye que nun sois lo llambiones que debiérais!
Tan pa morise, y lo meyor ye qu'almiten un montón de cambios, les pebíes de chocolate negru por chocolate blancu o con lleche, o nueces, o ablanes, quitar l'azahar, poner esencia de nosequé... 
Asina que partiendo de la receta base de la masa, lo que vos digo siempre, abrir la nevera o l'armariu y a ver qué tenéis... ¡A probar!
Una cosina a tener en cuenta... cuidáu, que como ye bollería de pan, dura pocu tiempu nel so puntu, lo ideal ye faelos pa comer nel día, y si non,  siempre pueden moyase nun cafetín... ;)



*("bollinos" ye muncho decir, "bollos" quéda-yos meyor, son grandes, igual préstavos más faelos cola metá de masa y que vos salgan 16, pero cuidáu, hai que tar pendientes del fornu, si'l tamañu cambia los tiempos de cocción, tamién).

Pa facer 8 bollos vamos necesitar:
  • 270 ml de lleche d'almendres (o normal).
  • 20 gramos d'aceite de mirasol.
  • 15 gramos d'azúcre.
  • 1 cuyarada y cuartu d'agua d'azahar.
  • 450 gramos de farina de fuercia.
  • 25 gramos de formientu frescu.
  • 100 gramos de pebíes de chocolate negru (o con lleche, o blancu o ablanes...).
  • pliczcu de sal.
  • mantequilla pa pintar.

Entemecemos .tolos ingredientes y dexamos nuna conca la masa hasta que doble de tamañu, una hora mínimu. 



Cuando hayan medrao, dixebrámoslos en cachos de 100 gramos, si queremos faelos grandes, o de la metá, si vos presten pequeños. Boleámoslos enriba la meseta y asitiámoslos nuna bandexa de fornu con papel hasta que suban, como 1 hora más.
Pintámoslos con mantequilla fundida y metémoslos nel fornu a 190 graos durante 20 minutos (si los ficísteis pequenos controlái...)





Dexamos esfrecer y merendamos con un vasín de lleche o un cafetín... ¿daquién dá más?

Muá.

lunes, 2 de marzo de 2015

Velvet Cheesecake brownies

... o como tirase'l pegote col nome d'una receta. Pos sí, too eso ye esta tarta/bizcochu. Delantre de too tendría que dir la palabra "Red", pero como'l mio colorante coloráu nun val pa enfornar, (pero entá asina lo usé), decidí quitar el color del nome pa que nun lleve a erru :)

El casu ye que ye lo Rede, lo Blue, lo Pink que queráis dependiendo del tinte que-y echéis. O nun-y lo echéis, de sabor va tar igual, l'aspeutu ye lo que va perder un pelín...


Agora a lo que vamos... ¡Vaya pasada de postre! Ye facilísimo, super guapu, resultón y sabe perricu, de verdá de la bona, tenéis que faelo.
Ta basáu na clásica tarta Red Velvet, pero en fácil y en rápidu, dexando d'ella'l sabor super especial y la testura y color característicos. 
Imaxínomelo p'acabar una cena con amigos, con un heladín de nata de la Ibense, ¡o de naranxa! Ai, naranxa y nata, la mio debilidá... Encamentáu...

Nesta receta va haber dos partes, pa entendenos, la parte del "Velvet "y la parte del "Cheesecake", caúna colos sos ingredientes. 

Vamos colos ingredientes del Velvet:
  • 115 gramos de mantequilla pomada.
  • 120 gramos d'azúcre.
  • 2 güevos grandes.
  • 2 cuyaradines d'estractu de vainilla.
  • 30 gramos de cacáu en polvu.
  • plizcu de sal.
  • 1 cuyaradina de colorante coloráu (mirai a ver lo que pon el fabricante).
  • 3/4 de cuyaradina de vinagre.
  • 100 gramos de farina de trigo.
Agora pal Cheesecake:
  • 250 gramos de quesu crema a temperatura ambiente.
  • 1 güevu grande.
  • 40 gramos d'azúcre.
  • 1/2 cuyaradina d'estractu de vainilla.

Empezamos arroxando'l fornu a 180 graos.
De siguío, engrasamos o forramos con papel del fornu un molde, nel mio casu usé unu de 20*20 centímetros, asina que esta receta ye la cantidá pa un molde d'esi tamañu, si ye un poco más o un poco menos grande tampoco pasaría nada, namás tenéi cuidau de que nun se vos queme o de lo contrario.


Batemos coles barilles la mantequilla y l'azucre, de siguío añedimos los güevos enteros, ún per ún y l'estractu de vainilla.
Tamién echamos el cacáu espayáu y el sal y siguimos batiendo, añedimos el colorante y volvemos bater hasta que too l'amiestu ta igualau. Añedimos el vinagre y siguimos batiendo.
Añedimos la farina al  amiestu,  adulces hasta que la acabemos toa.
Yá tenemos la parte del Velvet, agora, un pocu a güeyu, guardamos 1/4 del amiestu y echamos el restu nel molde que forráramos.



Pal Cheesecake empezamos batiendo'l quesu col güevu, l'azucre, la vainilla y entemecémoslo too mui bien.
Echamos esti amiestu percima de la masa de Velvet que tenemos nel  molde y cubrímosla entera. 
Agora tenemos que volver al cuartu de masa de Velvet que teníamos reserváu y echámoslo a cuyaraes percima del Cheesecake, cuando lo tengamos too echáu enriba, cola punta d'un cuchiellu vamos espurriéndolo pol molde faciendo dibuxos enriba de la parte blanca, yo soi demasiáu impaciente y nun me quedó chulo del too, pero si-y dedicais un tiempu, de xuru  que vos queda xenial.

Y yá lo tenemos, agora solo falta metelo al fornu arroxau a 180 graos 25-30 minutos.

Teneis qu'atrevevos porque ye un prestror :)

Muá.

miércoles, 25 de febrero de 2015

Espirales de quesu y vainilla

Hai delles vegaes que se te vienen a la tiesta milenta recetes que viste n'algún blogue o llibru y que quies faceles toes yá y nun te decides... Delles vegaes lo meyor ye abrir la nevera y mirar a ver qué tienes y con eso mirar a ver qué pués faer. Y eso ye lo que fice yo, y taba enllena quesu d'untar (coses del trabayu de Sergio...) Así que m'alcordé de unes galletes perbones que viera fai tiempu nun blogue xenial que ye Ma Petite Boulangerie. Y púseme a ello, y oxalá os pongáis vosotros, son adictives... ¡y el blogue tamién! 
Muncho más que recomendable.


Pa facer estes delicies vamos necesitar:
  • .100 gramos de mantequilla en dadinos a temperatura ambiente.
  • 200 gramos de quesu d'untar.
  • 250 gramos de farina de repostería.
  • 3 cuyaraes d'azúcre.
  • pliczcu de sal.
  • 1 cuyaradina de pasta de vainilla, o esencia, o una vaina...







Entamamos batiendo perbién la mantequilla col quesu, la sal y la vainilla.
Añadimos-y la farina y entemecémoslo bien hasta que tea uniforme.

Ponemos la masa ente papeles de fornu y espurrímoslo con un rodiellu hasta tener 2 o 3 milímetros de grosez, y lo más rectangular posible.
Metémoslo na nevera media hora.

Cuando pase'l tiempu, sacámosla, y, dempués de quitar el papel de riba de la masa, espolvoriscámosla con 3 cuyaraes d'azucre y endolcámoslo pela parte más ancha.





Cortamos el cilindru resultante en 24 cachos d'un centímetru y mediu más o menos.
Rebozamos les espirales n'azucre y ponémosles nuna bandexa de fornu con papel.
Tenémosles dientro a 200 graos durante 20 minutos o hasta que doren.



Dexámosles enfriar y a por elles :)

Muá.

lunes, 16 de febrero de 2015

Bollinos de lleche

¡¡Pero qué riquísimos!! 
Too entamó pensando que-y podía facer al rapaz pa que comiera la mermelada de piescu, y de lo que nun ye piescu, que tenemos guardao... (que nun ye poco, qu'esti branu foi mui productivu), tenía que ser daqué suavino pa que nun repunara na boca y consistente, pa que aguantara por ello. La verda ye que nun dudé, apetecióseme facer Bollinos de lleche. Y equí tan.


Pa facer 16 bollinos vamos necesitar:
  • 500 gramos de farina blanco.
  • 2 sobres de formientu de panaderu.
  • 250 ml de lleche.
  • 70 gramos de mantequilla pomada.
  • 40 gramos d'azúcare. 
  • 1 güevu.
  • 2 cuyaraes de miel.
  • plizcu sal.


Amestamos nun bol grande la farina y el formientu pa que ten bien repartido. 
Añadímos-y el güevu y la lleche.
Dempués l'azúcare, la miel y la sal, y amestámoslo too bien.
Agora tenemos que añader la mantequilla y masamos  hasta que te bien axuntao, unos 10 o 12 minutos, yo enfariñé la meseta pa que nun se me pegara, y quedaron mui bien, así que nun dudéis si se vos pega a les manes, farina y yá.

Cuanto tea, facemos una bola que tien que tar bastante lisina, y metémosla nun bol enfariñau y tapáu dos hores, cuando lo saquemos va tar col doble de tamañu.
Al sacalu hai que desgasalu, esto ye quitai el escesu gas que surdió pola lleldadura, pa ello, damos-y colos deos a la masa un ratín hasta que veamos que baxó´l volúmen.
Partimos la masa en 16 cachinos y facemos con ellos una forma como de mini pan, podemos face-yos dellos cortes pa que queden más prestosos, pintámoslos con lleche y dexámolos reposar na bandexa del fornu 20 minutinos.

Hai que dixebralos unos centímetros porque crecen mientres lleldan y mientres cuecen.
Hai que tenelos nel fornu 10 o 12 minutinos a 180 graos.
Dexalos enfriar nuna rexilla y listos pa comer. 


Mmmmmm

Muá

jueves, 29 de enero de 2015

Mantecaes Sara

Mantecaes Sara, que sepáis qu'el nome vien de que me lo dixo mi madre y yo nun-y pregunté más, a mi valióme :) Y que sepaís tamién que son les mantecaes de tola vida, les que saben a rico y les que podemos facer siempre en casa porque nun tienen ingredientes complicaos d'alcontrar, que parez que agora hai que facelo too con brotes de coses y semilles de brotes...

Son mui cencielles de faer, sin complicaciones, como vos dixe que diba ser too, y riquísimes, que tamién vos lo dixera ;)

Hai que tener papelinos pa madalenes o moldes de madalenes.


Vamos necesitar:
  • 200 gramos de mantequilla.
  • mismu pesu de farina.
  • mismu pesu d'azúcare.
  • 1/2 sobre de formientu tipu Royal.
  • 3 güevos.
  • ralladura de limón.
Precalentamos yá el fornu, porque ye tan rapidísima de faer qu'igual nun vos da tiempu a que tea arroxau anantes d'acabar de mezclalo too
Batemos muncho mucho la mantequilla, hasta que tea como pomada y nun tenga ningún grumu, echamos-y los güevos d'ún n'ún mientras seguimos batiendo.
Echamos l'azúcare, y batimos.
Mezclamos la farina col formientu y la ralladura, y batimos.
Rellenamos los papelinos de madalenes hasta la mitá, y metémosles nel fornu a 180 graos 15 minutinos.

¿Complicao? Nun me digáis... ;)

Muá

jueves, 22 de enero de 2015

Galletes rellenes de mermelada, por exemplu.

Inventinos fatos que acaben siendo recetes sorprendentes... eso ye lo que son estes galletes rellenes de mermelada, por exemplu. Y digo 'por exemplu' porque ocurrióseme eso, pero pueden tar rellenes de lo que más vos pete, trocinos de ablana, chocolate, confitures...

Vamos necesitar un cortapastes cuadrau.


Pa facer unes 20 galletes vamos necesitar:

  • 125 gramos de farina.
  • la yema d'ún güevu.
  • 40 gramos d'azúcare glas.
  • 40 gramos d'azúcare normal.
  • 125 gramos de mantequilla ablandada.
  • 10 gramos d'azúcare vainillao.
  • plizcu sal.
  • 70 gramos de ablanes feches farina.
  • 1 cuyaradina de canela.
  • unes poques ablanes pa decorar.
  • la mermelada que mos preste, la mía ye de piescu, por supuesto ;)
Entamamos tamizando la farina na encimera, facemos-y un furacu y echamos-y dientro la yema'l güevu, l'azúcre, la sal, la mantequilla en trocinos, l'azúcre vainillao, la canela y les ablanes molides. Trabayámoslo mui rápido hasta que te too bien mecío, envolvémoslo en film y dexámoslo una hora na nevera.
Arroxamos el fornu a 180 graos.
Estiramos la masa con rodillu na encimera con farina hasta que tenga 4 milímetros más o menos, nun les dexéis mui gordes porque entos nun van faése bien. 

Cuando tean, cortámosles col cortapastes en cuadraos de 5 cm (esi yera el mio cortapastes, pero el que tengáis) y pintamos la mitá d'elles con agua pa que al poner la otra mitá enrriba d'elles peguen y nun se abran al cocinase. Echamos-yos una cuyaradina de mermelada nel centru y tapámosles con otra sellándolo bien colos deos pa que nun abran.
Antes de meteles nel fornu pintámosles con lleche y echamos-yos enrriba un plizcu de ablanes picaes. Tenémosles nel fornu a 180 graos de 10 a 13 minutos.



Cuando les saquemos hai que dexales enfriar anantes de quitales de la placa'l fornu, porque pué pasar que se mos rompan.
Y oi, yá tan listes, vais flipar, contáimelo... ;) 

Muá


miércoles, 14 de enero de 2015

Galletes de dos colores

 A ver... nun podemos dicir que seyan rápides, pero agora nel inviernu, con esti fríu y estes poques ganes de salir... ¡nun veo cosa meyor que facer! Eso sí, rápides non, pero fáciles son abondo. Divertides de facer y de ver, nun vos digo de comer... ;)

De materiales técnicos tenemos que tener un cortador de galletes y un rodillu pa alisar la masa.


Pa facer estes galletines vamos necesitar:

  • 250 gramos de farina.
  • 1 cucharadina de formientu en polvu.
  • 125 gramos d'azucare glas.
  • 1 güevu.
  • 1 cucharadina de vainilla molida o algo paecío.
  • Plizcu de sal.
  • 125 gramos de mantequilla.
  • 2 cuyaraes de cacau en polvu.
  • 2 clares de güevu.
  • 1 cuyarada de lleche.
  • 1 cuyarada d'azucare glas.
Mezclamos nuna conca la farina, el formientu, l'azucare glas, la vainilla, el plizcu sal y la yema'l güevu.
Cuando te too esto bien mezcladino, echamos-y la mantequilla en cachinos pequeños, amasamos seliquino y cuando tea too más o menos xunto, echámoslo na encimera enfarinada.
Hemos xuntalo mui bien, pero na más que te homoxéneo, nun movemos más la masa, partímosla en dos mitáes y dexamos una na nevera.
Na mitá que dexamos fuera, echámos-y la cuyarada d'azucare glas, la cuyarada de lleche y el cacau. Mezclámoslo too, mientres que veamos cachos sin cacau seguimos, en cuanto te axuntao paramos de movelo y pa la nevera.
Hai que dexar enfriar les mases una hora.

Pasau el tiempu sacámosles y estiramos la masa de chocolate col rodillu, hasta que quede de mediu centímetru más o menos, partímosles col corta pastes y ponémosles nuna bandexa de fornu; cuando les tengamos toes, les de la primera masa, cortamos les segundes, les blanques, y anantes de poneles enriba les primeres, pintamos estes con clara de güevu pa que peguen, ponemos-yos enriba les segundes y pal fornu.
Vamos tener que teneles dientro 12-15 minutinos, col fornu a 180 graos.
Nun vos paséis de tiempu que son finuques y quemen fácil ;)

¡Qué vos presten! Muá