lunes, 15 de diciembre de 2014

Galletes de navidá

Les navidades acérquense peligrosamente, y esti añu apetecióseme decorar l'árbol con galletes, d'eses que tanto salen nes películes...
Son muncho más fáciles de lo que pensaba,¡ y muncho más divertides!

Vamos necesitar un rodillu pa estirar la masa, una payina y cortapastes navideños :)



  • 125 gramos de mantequilla.
  • 90 gramos de azúcare moreno.
  • 140 gramos de sirope de arce.
  • 320 gramos de farina tamizao.
  • 2 cuyaradines de  jengibre en polvu.
  • 1 cuyaradina de formientu químicu.
  • Caramelos de colores.
Tenemos que xuntar la mantequilla reblandecido col azúcare moreno hasta que faigan una crema suavina.
Echamos-y todos los demás ingredientes y mezclamos hasta xuntalo too bien y que se vea homoxéneo. Facemos una bola con ello y pa la nevera ¡tola nueche!. Tamién podéis dexálo na nevera yá estirao, así igual ye más fácil cortales al día siguiente, pero pa eso hai que tener muncho sitiu na nevera, y nun yera el mio casu ;)

Al día siguiente estirámosla entre papeles de fornu hasta que tenga 6 o 5 milímetros, cortamos col cortapastes y cola payina facémos-yos un furaquín na parte d'arriba, pa poder colgales y ponémosles nuna bandexa de fornu forrada con papel.
Tenémoles allí 12 minutinos a 180 graos. 

Pa les que parecen vidrieres, hai que picar un poquitín los caramelos y ponelos nel furacu que queramos rellenar, meteles nel fornu y el caramelu al derretise ocupará el espaciu.
Pa desmoldar estes galletes cola vidriera, hai que esperar a que dexen de faer burbuxes pola parte del caramelu, que seque, si les levantáis anantes van dexar el caramelu pegau a la bandexa... cuidadín.

Agora na más vos falta da-y a la imaxinación, y a la paciencia (que tampoco ye el mio casu), decorales como vas vos pete, con chocolate blancu queden mui guapes, con glasa real más guapes tovía, con confetis de colores... 


Muá.

(Receta de Blaukitchen)

miércoles, 10 de diciembre de 2014

Tarta fácil de chocolate

Esti fin de semana llargu que tuvo orbayando, lloviendo, orbayando... a partes iguales, bien val pa facer una tarta, ¡y coméla! ¿apetezvos? ;)

Fícela el domingu pasau, que nun apetecía nada más que quedar en casa y nun se me ocurrió otra cosa que mirar a ver, colo que tenía polos armarios, qué tarta podía facer... ¡y salióme una riquísima y mui rápida!

A parte de los ingredientes, necesitamos un molde pa tartes.

tarta fácil de chocolate

Vamos necesitar:

  • Un paquete de masa brisa o masa quebrada, si queréis que seya rapidísima, (yá pondré la receta por si queréis facela vosotros).
  • 140 ml de nata.
  • 125 gramos de chocolate de postres.
  • 2 cuyaraes de azúcare glas.
  • 50-75 de nueces picaes.
  • 2 fueyes de xelatina.

Lo primero ye poner la masa nun molde que nos preste, pa esta cantidá de rellenu yo púsela nun molde de 24 centímetros, tien que quedar finín el rellenu, ¡que si non repuna! Pues eso, ponémosla nel molde y dempués pinchámosla muncho con un tenedor, tamién peles paredes, pa que nun suba de más. Metémosla nel fornu con garbanzos o fabines perriba, tamién pa que nun suba, y tenémosla ahí 10 minutinos a 180 graos.

Mientres, ponemos les fueyes de xelatina nuna conca con agua xelao; el chocolate al bañu maría y, per otru llau, la nata a calentar.
Cuando la nata fierva, separtámosla del fueu y, en cuantes que dexe de ferver, echámos-yla al chocolate, que yá tará un pelín desfechu. En principiu col calor de la nata el chocolate va fundise del too, si non, al tenelu al bañu maría nun hai problema de que se mos queme y podemos dexálu hasta que tea del too, ayudándolu moviéndolu con una cuyara de madera.
Cuando veamos el chocolate ensin grumos, suavín y too desfecho, echamos les nueces picaes.
Sacamos la xelatina del agua,  escurrímosla bien pa que nun meta agua a la receta y echámosla na mezcla. Hai que ablandar siempre la xelatina en agua xelao y siempre echala n'algo caliente pa que se desfaiga.

Agora pasarían yá los 10 minutinos de tiempu de la masa nel fornu, sacámosla y volvemos a metela otros 7-10 minutos pero sin llegumbres.

Cuando tea la masa, echamos-y dientro la mezcla, metémosla na nevera  pa que endurezca, y en una horina más o menos tenemos una tarta riquísima pa sorprender :)

Facé-yla, que va prestaros muncho el resultau, ¡de xuru!

Muá

lunes, 1 de diciembre de 2014

Galletines de quesu, galletes de seronda.

Invitaos, una ensalada sosa, entamu de la seronda... ¡Pues unes galletines salades de quesu p'acompañar! Fueron la sensación, y ficieron d'una cena normalina algo más especial. Facéiles porque nun vos van dexar indiferentes... ;)

Además de los ingredientes, tenemos que tener un rodillu pa estirar la masa y unos moldes, nesti casu, como son de seronda, unes fueyines.

Galletines de quesu

Vamos necesitar, pa unes 50 galletines:

  • 125 gramos de farina.
  • 125 gramos de quesu curao rallao.
  • 90 gramos de mantequilla.
  • Un plizcu de pimienta.
  • Un plizcu de sal.
  • 5 gotes de colorante alimenticiu verde llíquidu (si se quier).

Entamamos mezclando nunca conca la farina cola mantequilla, que nun te fría de la nevera, un pelín templada ye más fácil de axuntar colos demás ingredientes. Xuntamos tamién el quesu y damos-y vueltes a la mezcla hasta que te too homoxéneo.
Echamos la sal y la pimienta*, echamos el colorante. Nesti casu usélo verde y mui poquitín, pa que nun me lo tiñera too y diera la sensación d'algo vieyo, como una fueya que cae del árbol na seronda.

Estiramos la mezcla na superficie fría de la encimera enfarinada, dexando la mezcla a 1 centímetru más o menos, 
Cortamos colos corta pastes que mos peten, y pal fornu.

Hemos dexálo ehí un cuartín d'hora o menos, (echa-y vistacinos pa que nun se vos pasen) a 180 graos. Tenéi en cuenta que como lleven mantequilla nun van tar dures cuando ten feches, van endurecer en cuantes les saquéis del fornu, así que nun esperéis que lo faigan dentro ¡que se vos quemen!


*Eso ye lo que-yos eché, pero podéis echa-yos lo que queráis, pimentón, oriégano, ayu picáu, pintales con güevu pa que tean dorades (cuidao que al pintales col güevu suben un pelín y pierden un poquitín la forma que-yos diérais)... Podéis poneles dientro una ensalada como fice yo, pa untar n'elles patés o coses así, soles pa con unes aceitunines y una cervezuca... hai milenta opciones y de xuru que toes riquísimes.

¡Qué vos presten!  Muá.

lunes, 17 de noviembre de 2014

Palinos d'anís

Qué sorpresón cuando probamos los palinos d'anís y yeren como les rosquilles de les feries, eses que se compren en paquetinos de pásticu nes fiestes de prau... ¡qué riques!

Palinos d'anís. Galletes d'anís.

Vamos necesitar:
  • 1 güevu.
  • 100 ml d'aceite d'oliva.
  • 80 gramos d'azúcare.
  • 1 cuyaradina de vainilla molida.
  • 1 cuyaradina y media de semilles d'anís.
  • 250 gramos de farina.
  • 1 cuyaradina de formientu.
  • 1 cuyarada de lleche.
  • plizcu de sal.
Entamamos batiendo'l güevu col aceite, l'azúcare y la vainilla coles barilles hasta que tenga pinta d'espuma. Mayamos les semilles d'anís y echámosles a la mezcla.
Xuntamos la farina col formientu y la sal y echámoslo pallá tamién. Si vemos que ta poco moyao, echamos la lleche, si non nun vos fai falta dexáila pa prau.
Amasamos bien hasta que se xunte too y facemos un cilindru que metemos na nevera media horina, pa que dempués al sacalo tea duro y pueda amasase y da-y forma fácil.

Sacamos el cilindru de la nevera y cortámoslu en raxes; coyemos una y damos-y forma palín, colocámosla nuna bandexa de fornu con papel vexetal, y así con toes.
Tienen que tar nel fornu 16-18 minutos, a 160 graos.

¡Saca-ylos del fornu y a comer! Pero cuidadín, aguantar hasta qu'enfríen... ¿eh? ;)

Muá

martes, 28 de octubre de 2014

Brownies de chocolate

Nun ye que me punxera romántica de sópitu, non. Fícelo por da-yoslos a mios pas pol so aniversariu. Prestaron-yos abondo y espero qu'a vosotros tamién. Ye un postre fácil y mui resultón. Vamos con él.

Como cosa teúnica necesitamos un molde (a ver, que nun fai falta que sean corazoninos, nin ositos, nin flores... Con un molde pa bizcochos normales val de sobra) ;)

Brownies de chocolate y nuez

Ingredientes:

  • 120 gramos de mantega.
  • 150 gramos de chocolate picao.
  • 200 gramos d'azúcare.
  • 2 güevos.
  • 120 gramos de farina.
  • 150 gramos de nueces picaes.
  • Plizcu de sal.
Prendemos el fornu a temperatura fuerte: 180 graos más o menos.
Entamamos poniendo nel fueu mui suavino, al 2 ó 3, la mantega y el chocolate, pa que fundan y se xunten.
Cuando tean, quitamoslo del fueu y echamos l'azúcare mientres revolvemos; dempués los güevos enteros d'ún nún; la farina; y pa finar, les nueces.
Cuando tea too bien mezclao, echámoslo nun molde engrasáu  y pal fornu 10 minutos.
Cuando pasen, baxamos la temperatura hasta los 150 graos, más o menos, y dexámoslo otros 10 minutos más.
(Si lo metéis en moldes más altos o más baxos que los mios de corazoninos, lo meyor pa saber que tan bien fechos, ye que metáis un paliyu de madera: tien que salir moyáu pero nun mancháu, el brownie tien que tar cremosu pel centru)

Nun faigais como yo y lo intentéis desmoldar na más salir: a parte de quemar, rompen... Esperái que yá veréis qué bien desmolden dempués d'un cachín. 
Echamos-y azúcare glas penriba con un colador (pa tamizalo y que nun queden gurullos).
Y llisto. 

Avisái de lo riquísimos que tán anantes de que los coman, que-yos pue dar daqué ;)
Muá.



miércoles, 22 de octubre de 2014

Galletes de mantequilla y vainilla

Préstame pola vida faer galletes en casa pa nun tener que mercar de les industriales. Ye mui fácil, de verdá. Y merez muncho la pena'l sabor y la tranquilidá de saber que tán feches por tí y que tolo que lleven ye bueno.
Estes galletes son una versión de les de mantequilla de tola vida (que dalgún día pondré equí), ameyoraes. 
Pa que queden curioses con esta receta, teniendo en cuenta'l tiempu nel fornu y los graos, hai que cortales más o menos igualadines y aplastales con un rodiyu. Asina que necesitamos cortapastes y rodillu.


Pa 40 galletines, más o menos, vamos necesitar:
  • 250 gramos de mantequilla.
  • 250 gramos de farina.
  • 125 gramos de maicena.
  • 125 gramos d'azucare.
  • Plizcu de vainilla molío (o una caxina de vainilla: yá sedría xenial).
  • 1/2 sobre de formientu químicu.
  • 1 güevu.
  • 2 cuyaraes de nata llíquido.
  • Cacau en polvu.
  • Un plizcu sal.
Mezclamos nuna conca: la farina, la maicena, el formientu y un plizcu sal xunto cola nata, y amasámoslo mui bien.
N'otru sitiu, batemos coles barilles llétriques la mantequilla col güevu, l'azucare y la vainilla hasta que tea mui suavina, y déxamoslo envuelto en film 1 hora na nevera.
Precalentamos el fornu a 175 graos.
Enfarinamos mui bien la encimera pa char la masa enriba y poder estirala col rodiyu (nun vos cortéis cola farina, va chupavos muncha hasta que podáis estirala sin que se vos pegue; enfarinar tamién el rodillu y les manes).
Estiramos bien la masa hasta que seya de 4-5 milímetros (ye importante que, aunque seya más o menos gruesa, toles galletines seyan iguales). Pa los que como yo nun tais mui dello, lo meyor que facéis ye cortar la masa en 4 cachos, y dir estirándolos y cortando les galletes d'una nuna (si non, ye muncho más complicao).
Ponemos un papel de fornu nuna bandexa y vamos poniendo les galletines cortadines (nun fai falta separales muncho, nun crecen).
Metémosles p'allá de 12 a 15 minutos (depende de lo gordes que les ficiéreis: nun tienen que quedar mui doraes, na más que se-yos quite'l colorucu blancu).
Cuando tean, sacámosles y chamos-yos penriba cacau en polvu.

Amás del sabor que tienen, que ye un prestor, ¡va golevos la casa...!

Muá

martes, 14 de octubre de 2014

Fogaza de pan riquísima, facilísima y rapidísima.

¡Pan caserísimu! 
Nun me lo podía creer cuando ví'l mio primer pan con tan buena pinta... Y nun se necesita ni panificadora, ni maquinina carísima, ni saber amasar... 

Pues bien, vamos entamar colos miedos que desapaecen al faer esti pan:
 - ¡Hai qu'usar ingredientes raros, y nin sé nin onde mercalos!
 - ¡Nun tengo panificadora!
 - Tol mundu me diz lo difícil que ye amasar.
 - El mio fornu nun tien aire.
 - Hai que face-y 2000 amasaos y 40 hores d'espera.

Fogaza de pan casero

¡Non! Y vamos empezar cola receta pa que vayáis entrando en farina ;)
  • 220 gramos de farina integral tamizao.
  • 220 gramos de farina blanco de fuercia.
  • 7 gramos de formientu secu activu (cómprase en sobres pequeños, como el formientu tipu Royal)
  • 1 cuyarada sopera de sal fino.
  • 250 cl. d'agua templao.
  • Plizquín d'azúcare moreno.

Hai qu'empezar precalentado'l fornu pa que tea arroxadín cuando metamos el pan. Asína que ponémoslu a 220 graos.
Vamos poner nuna conca grande les dos clases de farina col formientu, la sal y l'azucare. Cuando tean tolos ingredientes secos bien mezclaos, chamos-y l'agua. ¿Cuánta? Pues esto si qu'hai que dir viéndolo: empezái con 50 cl. d'agua templao, y vais chando poquitín a poco hasta que notéis que ye más fácil amasalo. Amasáis un cachín, pero nun vos paséis: cuando nun se vos pegue la masa a los deos ye que yá ta.

Facémos-y forma de bola a la masa y ponémosla enriba d'una bandexa de fornu con un papel, pa que nun se mos pegue. Embadurnamoslu con aceite vexetal, tapamos con film y dexamos que repose 30 minutos (si ye más, meyor, pero menos non, que tien que yeldar pa que mos quede una fogazuca curiosa).

Pasáu'l tiempu, facémos-y unos cortes penriba y que repose tapáu col film 10 minutinos más.

Agora vien el trucu... Pa que mos salga con esa cortecina tan profesional, hai que pone-y xelu nel fondu´l fornu, meter la fogaza a media altura y esperar...

En 30 ó 40 minutinos (yo túvelo 30 porque éntrenme nervios y ganes de ver qué tal...), tenemos el pan. ¡Y qué pan! :)

Muá
(Receta de Lorraine Pascale)

jueves, 2 de octubre de 2014

Madalenes de chocolate rellenes de mermelada de piescu

Pues, faciendo honor al títulu del blogue, la mio primer receta tenía que llevar piescos en dalgún llau. Nesti casu metíos dientro d'una madalena de chocolate riquísima... 

Vamos necesitar un molde pa facer madalenes, los papelinos pa pone-yos y, en plan téunicu, nada más. Asina que vamos pola receta prestosa de güei :)

Madalenes de chocolate rellenes de mermelada de piescu

Vamos necesitar:
  • 125 gramos de mantequilla.
  • 125 gramos d'azucre.
  • 150 gramos de farina tamizao.
  • 1 sobre de formientu químicu, tipu Royal.
  • 2 ó 3 güevos, dependiendo'l tamañu.
  • 50 gramos de chocolate pa fundir.
  • Mermelada de piescu riquísima.

Primero, encendemos el fornu a 180 graos pa que tea bien arroxáu cuando acabéis de mezclalo too.
Entamamos la tema batiendo la mantequilla y l'azucre hasta que l'amiestu tea bien suavino (nun pue vese azucre nin mantequilla ensin mezclar).
Por otru llau batimos muncho los güevos.
Acabante, vamos echando los güevos seliquino a la mezcla del azucre y la mantequilla, hasta que tea too bien mecío. Metemos p'allá la farina y el formientu tamizao, poqutín a poco pa que nun mos cueste muncho.
Dempués echáis el chocolate fundío (podéis fundilo nel microondas con muncho cuidao de que nun se vos queme, pero si lo ponéis a poca potencia nun vais tener problema, y asina aforráis tiempu y manchar más coses...)
Amestaislo too bien bien y ¡llisto! Yá tais preparaos pa enllenar los papelinos de les madalenes.

Tenéis qu'enllenar la base del papelín col amiestu, dexando como un furaquín na metá pa meté-y p'allá una cucharadina de la mermelada de piescu. Dempués tapáis la mermelada con más amiestu y yá ta, pal fornu.

Hai que tenelo allá media horuca más o menos (eso depende muncho de cada fornu, pero vese bien por fuera, y sin nun sois quien a davos cuenta, lo meyor ye que metáis un pinchín de maera o un cuchiellu: si sal manchao ye que nun ta; si sal llimpiu, ta llisto pa sacar). Eso sí, nun vos asustéis si lo notáis blanduco, ye normal porque tien muncha mantequilla y hasta que nun s'enfríe nun endurez.

Espero que vos preste la receta tanto como a min. :D
Muá

Nel entamu

Nunca nun lo pensara na vida... Pero, equí toi, con un blogue... Diba dicir "de cocina", pero igual ye muncho dicir, vamos dexalo en "pa comer" ;)

Fai tiempu que, por coses de la vida, tuvi qu'entamar a cocinar. Ye verdá que vengo de familia chigrera, pero pa min que, como me lo daben fecho, nunca nun me paré a pensar nello... Pero, ¡ai, amigu!, cuando nun me quedó otra, fui poquitín a poco descubriendo cosines prestoses, faciendo les recetes de mio má y mio güela, cambiándoles pal mio gustu, descubriendo especies, sabores y restaurantes d'otros países y paecióme bien contávoslo: a quienes teis tan perdíos como yo nel entamu, a quienes tenéis una cocinuca pequeña, con un fornu ensin aire y nun tenéis pensao mercar 18 moldes diferentes, nin la Thermomix, nin potes con ases naranxa; a quienes, como yo, vísteisvos delantre una pechuga pitu y una ensalada de llechuga, tomate y cebolla nueche sí, nueche tamién; a quienes nun invitáis a casa a los amigos a ver el bañu nuevu porque nun sabéis que da-yos pa xintar... Pa toos esos ye esti blogue :)